Балдарда инсульт сейрек болсо да, өтө кооптуу оорулардын бири болуп эсептелет. Ал мээге кан жетпей калганда же кан куюлганда пайда болот. Негизги себептери – төрөт маалындагы кислород жетишсиздиги, жүрөк кемтиктери, жаракаттар жана инфекциялар. Инсульттун белгилери бала эмүүдөн баштартуу, шал болуу, сүйлөй албай калуу же эс-учун жоготуу менен байкалат. Ооруну өз убагында аныктап, дарыгердин көзөмөлүндө болуу өтө маанилүү. Бул тууралуу Эне жана баланы коргоо улуттук борборунун балдар неврологу, жогорку категориядагы дарыгер Нурмухамед Бабажанов “Ачык кеп” берүүсүнүн алкагында кеп кылды. Анын айтымында, бул ооруга жылына 20дай бала чалдыгат. Баланын ар бир кыймылына, ден соолугуна өзгөчө көңүл буруу жана үзгүлтүксүз медициналык текшерүүлөр инсульттун алдын алууга жардам берет.